Jam 1 | BEF | STEP | Nani Yemesita Hu'mamofihi koko pana'a to Sipi Bo Yesu Kilisitohi pana'amofita nani'ni fayahi nokoyobe. Lenali Isilaeli bona'magihi naga'i nayahi luga luga su hoto nigigusaga loemo leke ho malago tili tele hite bi'ahana bonatogati Yesuhi naga'a lolo hi'ahanamagihi keke'i lu epoloto ya'ma fayahi nokoyobe.

James 1

1 Nani Yemesita Hu'mamofihi koko pana'a to Sipi Bo Yesu Kilisitohi pana'amofita nani'ni fayahi nokoyobe. Lenali Isilaeli bona'magihi naga'i nayahi luga luga su hoto nigigusaga loemo leke ho malago tili tele hite bi'ahana bonatogati Yesuhi naga'a lolo hi'ahanamagihi keke'i lu epoloto ya'ma fayahi nokoyobe.

Keheli ule'ale huse'namu to lugufa le'mo ho metise'na

2 Nigibo nagabose, kalana'i nemele lepelenogomo yamofihi enimi'i melenogo lenali ule'a'ale hite keheli'ahanamofihi hapa'a huto hilibe lite keheli'ehite keheli sibina mehise lenegelo bite minalo. Lenali mono kagu amuya malalabe lite kalana'i mele lepalalana nasana yamagi lenele'mo bati hilune'mu nehabe. 4 Kalana'i nemele lepelenogomo fulu hite ule'ale hite minalana yamofihi komopatinigu mone sibina mehise bati hinogo mino lite bite minalana'mu yabe. 5 Lenalitogati bo moneuba keheliya ise'na'amu sa sa hulotomo Hu'mamofitoga loka henogo emilube'mu nohibe. Hu'mau ya'ma bona'i asaga'i enele'mo hetofa huto nohina bouba ka meepekise ana'ina kehelise'na sipi huto epilata nohibe. 6 Ana'ina lilufi melilufi luto ekesa loe lae mekehelise keheli monekoto moloto Hu'mamofitoga lino. Ekesa loe kehelilina bona'i yamofihi yasi lito hege nagami i bili fu ilata nohina ya suhi huto minalina'mu yabe. 7 Bona'i ya hana'amagi bego bego hite humofa'na bilata nehanaya ana'ina Sipi Bomofitogati mone melilana'mu yabe.

Yogo fe'noha'a hiti muhi ni'ina bo

9 Muhi meni'ina bona'i lenali'i Hu'mau lenele'mo bati hulata nohina'mu yamofihi legegelo bite minalo. 10 To yogo fe'nohatini hiti bona'i lenali fe'no kumu mekeheli'ahana yana'mu lenegelo bite minalo. Fe'noho bona'magi kifina haya'a uya'i loto i helili huto limo noina suhi hite limo ilana'mu yabe. 11 Yegeuba tito nolenogo kifina haya'a i pigilina'mu yabe. Uya'i loto limo ilenogo okaba'a sekuya bito fenene hilina'mu yabe. Ana hite, fe'noha'ani hiti bona'i to foya'aniga nebite haya kalalana'mu yabe.

Kalana'i molo epolose'na to fi taga huse'na

12 Kalana'i nemele lepelenogomo fili tegi hite meminalana'a yamagi enegelo bite minalana'mu yabe. Fi taga hi epelenogomo su nehenogo yamofihi Hu'mamofitoga komopa'ani emite minalana bona'i epilube luto lu molo'ehina nasana yamofihi babeyafa'a minoba minoba huse'na liluta'mu yabe. 13 Fi taga nehi lepelenogo yamofihi Hu'mau fi taga nohu letafi lite melilo. Bo moneubafi nasana moneubafi foipa nasanauba Hu'mamofihi fi taga mehu etalube'mu nohibe. To nasana foipana mone kumu Hu'mau fi taga hu etalina'a meni'ibe. 14 Fi taga hu epolose'nauba ya'ma bomofihi ipagu foipa laga besina kauba kafa kelefu gilata nehana suhi huto fi taga hu epololata nohibe. 15 Foipa laga'nauba panamu'i ito ketalina gi'a foipana yabe. Foipanauba panamu'i ito ketenogo pulu tilina gi'a filise'na yabe lilune.

16 Komopa'ni nolepuna nalalu'nigita, haya mekalalo. Fi taga hu epololata nasana ya'ma Hu'mamofitogati meni'ibe. 17 Asaga nasana bati huto lele'mo lamana hulata nasana lamana'a yamofihi Hu'mamofitogati ni'ibe. Afotifu Hu'mau ai kokulumagu fi fana tolata nasana asaga'i sonofi'i hiti ikahi hiti yege hiti enele'mo huto hu'ehina bouba hetofa nasana limilata nohina yabe. Ana huto ana'ina li gelehe galaha hilata nehanaya Hu'mau anamofihi suhi menohibe. 18 Lali Hu'mamofihi yagapana'amagita yata'a hapi fito lolo hilune luto Hu'mau ekesa keheli'ehinalo ai kaga'alo keheli amuya melenogo lemehati kosaba'i limi'ehibe.

Hu'mamofihi ka'a kehelite mege'i malalo

19 Komopa'ni nolepuna nalalu'nigita, lenali ya'ma kaga'ni kehelilo. Lenali Hu'mamofihi ka'a mele'isi nekehelite fulu hite kaga lite lenita bilina nasana'mu kaga mele'isi melilo. 20 Lenita bise'na yauba Hu'mamofihi gobisalo mino lamana hilune luto ana'ina lolo huto moloto nohiluta nasanauba mone li huto mehilina'mu yabe. 21 Komopati filise'na to foipa nasana lilata'na yamofihi asaga'i he'mite Hu'mamofihi kaga'a komopatinigu molo'ehinamofihi li pili kete lilo. Hu'mamofihi kaga'auba lenubuto bilina nasana ni'ibe. Aimo agoya hi emilo.

22 Hu'mamofihi kaga'a ya'ma keheliya ilo. Fa'mene kehelite alihi he'milana yamofihi haya kalalana'mu yabe. Kaga'a kehelilete mege'i malalo. 23 Bona'i luga'amagi ya'ma Hu'mamofihi ka'a enegekesa fa'mene kehelite keheliya meilana yamofihi gapo gapolugu enokaba enabaga bu galata nehana ya suhi huto ni'ibe. 24 Enubulo bu gelete bite mele'isi okaba'animofihi hapa'a enegekesu holata nehana suhi huto ni'ibe. 25 Bona'i luga'amagi Hu'mau keya ka lu'ehina lama'naka lite enehe'mo'ehina kagamofihi Hu'mamofihi hapa'amu sa sa helite nebinogo enegekesu mehenogo keheliya ite minalana ya'ma Hu'mau lusa gi epelenogo enegelo bite minalune'mu nehabe.

26 Luga'amagi enali Hu'mamofihi amuya'a kehelito nominone lite lilana'a ya bona'magi enabaga'ani kaba mehilana yamofihi bona'i ya'amagi mono ka nolupihe lite faga heletuya'a lilune'mu nehabe. 27 Megusa yagapana'i to keto ana'i ete keta noepesinogo enele'mo bati hiluta to metoga bona'magihi enipakafa hose'nauba lele'mo sibina hu laligi luto kaba huto minaluta ya'ma Hu'mamofihi amuya'amu kehelito lusi mono kagalugu minaluta nasana hiti Hu'mamofihi bulo mino fe luto lama'naka, minalube'mu nohibe.